صار في عنوان..

اليوم الاحد قبل تلت سنين كان اربعا

كان يوم عاطل كتير هداك الاربعا رغم اني بشكل عام بحب يوم الاربعا

 هداك الاربعا كان تاني بوابة الي بعالمي الجديد

الاحد اللي قبل خمس سنين كان البوابة الاولى 

بتصدق هالسنة كنت ناسية اصلا التاريخ وهالذكرى السيئة؟ حرفيا مكنش خاطر ببالي بين كل هالضغط اللي عايشتو

طبعا مش ناسيتك، اصلا ولا بعمري نسيتك مش بحاجة اشرحلك نفسي 

مكنتش متوقعة بيوم انو انسى هيك تاريخ رغم انو بعدو مش صاير بالزبط ذكرى وانت فاهم علي 

بعرفش اذا انا مبسوطة عشان ناسية بعرفش اذا معناها انو انا عم بتخطى الاشي او عشان مضغوطة كتير ومشغولة اخر فترة- مع انو بنص اميركا تزكرت هاليوم- او وبعرفش اذا لازم ازعل اسا وابكي زي قبل سنة وسنتين او اصلا لازم انسى او لا

على كل حال، بتمرق الايام وبتوقفش الحياة بالعاطل وبالحلو 

بس مع هيك بمنعنيش من اني اتمنى انو تكون هون النهاية 

وميرجعش هاد اليوم كحقيقة، بس كذكرى عاطلة اللي راح ننساها عالاخر يوما ما

خليك قوي وخلي ضلعك ثابت

مشتاقة كتير 

قبل اكم سنة كتبلك هدول الكلمات رغم اني مكنتش شايفة امل انو الوضع يتغيّر بس مع هيك تغيّر

بتزكر منيح هداك اليوم اللي قلب كل اشي كان فوق

بتزكر قدي بكيت بالايام اللي قبلو وقدي دعيت ربي 

بتزكر لما صارت السيعة تسعة وكنت ارج من الخوف

بتزكر لما اتصلتلي على التسعة و٢٥ دقيقة وانا هون ارتعبت فكرت كل احلامي راحت

 بتزكر كيف صرت ابكي على محطة الباص قدام الرايح والجاي من قد ما كنت مبسوطة

كتير بحب هاي الذكرى بحياتي ٢٢.٩

يا ريتك ما رحت

يا ريتك ما غبت عني

يا ريتك دايما حدي 

يا ريتك تعيش للابد وما تروح عني

يا اغلى ما في الوجود على قلبي

يا ريت عملت كل اشي تاني غير

بس وجودك بحد ذاتو مريح

شكرا انك انت انت

شكرا انك معي